Бөтә яңылыҡтар
СОЦИАЛЬ ӨЛКӘ
18 Сентябрь 2020, 11:11

“Күршеләр килмәҫме тип көтәм”

Лидия әбей Стәрлебаш районының Ивановка ауылында яңғыҙы йәшәй. 80 йәштә булһа ла, биҙрә менән һыу ташый, кәзә аҫрай, умарта тота, тормошона зарланмай./

Лидия әбей Стәрлебаш районының Ивановка ауылында яңғыҙы йәшәй. 80 йәштә булһа ла, биҙрә менән һыу ташый, кәзә аҫрай, умарта тота, тормошона зарланмай.

Ошо бәләкәй, әммә йәмле йортта 80 йыл эсендә бер ни ҙә үҙгәрмәгән. Бында уның олатаһы йәшәгән, ошо өйҙән бер йәшлек Лидияның атаһын һуғышҡа оҙатҡандар. Ул фронттан әйләнеп ҡайтҡанда, ҡыҙ инде биш йәшлек булған.

Әсәһе ҡыҙын тәрбиәләмәгән, уны атаһынан тыш, өләсәһе һәм олатаһы ҡарап үҫтергән. Тормошҡа сыҡҡас, Стәрлетамаҡта йәшәгәндәр, бынан утыҙ йыл элек ире менән ауылға әйләнеп ҡайтҡандар. Ул саҡта ауылда ни бары дүрт йорт ҡына ҡалған булған. Ә хәҙер Лидия Ефремова – бында берҙән-бер хужа! Магазин булмағас, район үҙәгенә ярты йылға бер тапҡыр барып әйләнергә тура килә.

– Мин аҙыҡ-түлекте килограмлап түгел, ә тоҡлап алам. Йәшелсә, һөт, ит етерлек. Тәбиғәттә рәхәтләнеп йәшәйем. Бер нисә километр арала йән эйәһе булмауы һис ҡурҡытмай. Күрше ауылдар халҡы хәлемде белә, – ти ул.

Лидия Николаевнаның йорт стеналары тарихи экспозицияға әүерелгән. Олатаһы файҙаланған эш ҡоралдарына бер быуаттан ашыу. Тәү ҡарашҡа ул яңғыҙлыҡтан яфа сиккән кеүек, ғәмәлдә һис тә улай түгел, нәҫел-нәсәбе, таныш-тоноштары Ивановкаға юлды һыуытмай. Ҡалала йәшәгән балалары эргәһенә күсенергә лә ниәте юҡ, киреһенсә, ҡасандыр тормош гөрләп торған ауылда яңы йорттар ҡалҡыр, күршеләр күбәйер, тип өмөтләнә әбей.
Автор: Д. ҒӘБДРӘХИМОВА.
https://bash.rbsmi.ru/articles/sotsial-m-s-l/k-rshel-r-kilm-me-tip-k-t-m/
Читайте нас: