Археология – тарих фәненең мөһим бер өлөшө

Мауыҡтырғыс та, ҡатмарлы ла, мөһим дә булған археолог һөнәрен һайлаған яҡташыбыҙ, Степрной ауылы егете, “Башҡортостан Республикаһының күсемһеҙ мәҙәни мираҫ объекттарын һаҡлау һәм файҙаланыу буйынса ғилми-производство үҙәге” дәүләт учреждениеһы филиалы - «Ирәндек» тарихи-археологик һәм ландшафт музейы-ҡурсаулығы мөдире Рәмил Насретдинов менән әңгәмәбеҙ ҡыҙыҡлы булыр тип ышанабыҙ.

- Рәмил Ринат улы, нисек археолог булып киттегеҙ?

- Археолог – ул, тәү сиратта, тарихсы. Степной һәм Аҡъяр мәктәптәрендә уҡыным. Уҡытыусым Фәттәх Илембәтов тарихҡа ҡыҙыҡһыныу уятты, шуға күрә лә тарих факультетын һайланым. Беренсе курста һәр студенттың археологик практикаһы булырға тейеш һәм ул беҙҙең районда Вәлит ауылы янында үтте. Унда сармат осорондағы ҡанбаба ҡәберлеге, таш алтарь, уҡ башы, көҙгө һ.б. табылды. Һуңынан йыл һайын практика үттем, ә 4-5-се курста иһә бер үк ваҡытта Өфөлә үҙ һөнәрем буйынса эшләнем. Әле 12 йылдан ашыу археология менән профессиональ рәүештә шөғөлләнәм.

-Районда ниндәйерәк археологик ҡомартҡылар бар?

• Хәйбулла районы территорияһында 150-нән ашыу археологик ҡомартҡылар барлығы билдәле булыуға ҡарамаҫтан, беҙҙең яҡтар тулыһынса өйрәнелмәгән. Йыл һайын беҙ пилот тикшеренеү барышында быға тиклем билдәле булмаған 2-3 ҡомартҡы табабыҙ. Ҡомартҡылар нигеҙҙә Маҡан, Һамар, Сәғит, Яңы Ергән ауылдары эргәһендә табыла. 2020 йылда беҙҙең тарафтан дистанциялы алым менән һауанан Маҡан ауылы эргәһендә ҙур ҡурған ҡәберлеге табылды. Ҡәберлектә 50-нән ашыу ҡурған иҫәпләнә. Был бик ҙур һан, сөнки бындай ҡомартҡылар һирәк табыла. Сиҙәм осоронда үҙләштерелгән участкалар ҡыҙыҡһыныу тыуҙыра. Ерҙәрҙе һөрөү һөҙөмтәһендә бихисап ҡурғандар юҡҡа сығарылған. Шуға күрә әле беҙҙең бурыс - был ҡомартҡыларҙы дистанциялы, ошо территорияларҙы һанлаштырыу алым менән табыу.

Мәҡәләне тулыраҡ гәзитебеҙҙең 66-сы һанында уҡығыҙ.