+11 °С
Болотло
Бөтә яңылыҡтар
ДӨЙӨМ МӘҠӘЛӘЛӘР
18 Сентябрь 2020, 10:57
Хөкүмәттә ниндәй үҙгәрештәр көтөлә?
-
Бөгөн республикала Хөкүмәт Премьер-министры тәғәйенләнде тип хәбәр иткәйнек. Был мөһим ваҡиғанан һуң Башҡортостан Башлығы Радий Хәбиров һәм Премьер-министр Андрей Назаров журналистар менән аралашты, Хөкүмәт алдына ҡуйылған бурыстар тураһында һөйләне.
Тәүге һорау Радий Хәбировҡа бирелде, унан Андрей Геннадьевичҡа ҡуйыласаҡ тәүге йөкләмәләр тураһында һоранылар.
– Андрей Геннадьевич быға тиклем дә Хөкүмәт етәксеһе бурыстарын атҡара ине. Шуға күрә һүҙ ағымдағы эш, инвестиция стратегияһы тураһында бара. Ә тәү сираттағы бурыстарға килгәндә, Андрей Назаровҡа Хөкүмәт структураһын һәм шәхси составын булдырыу кәрәк, – тине Радий Фәрит улы.
Дәүләт Йыйылышы – Ҡоролтай депутаттары көҙгө сессия эшен башланы. Улар алдына ла мөһим бурыстар ҡуйыла.
– Тактик әйберҙәр тураһында һөйләгәндә, шуға иғтибар итер кәрәк: беҙ еңел булмаған финанс-иҡтисади осорҙа йәшәйбеҙ. Шуға күрә депутаттарға бюджетты һәм сығымдарҙы ентекләп ҡарау, оптимизация үткәреү мөһим, – тине Радий Хәбиров, депутаттар алдындағы бурыстарға туҡталып. – Шул уҡ ваҡытта стратегия тураһында ла уйларға кәрәк. Тимәк, инвестициялар йәлеп итеү, эш урындары, яңы предприятиелар булдырыу. Беҙ был йүнәлештәр менән дә шөғөлләнәбеҙ. Коронавирусҡа ҡаршы көрәш тураһында ла оноторға ярамай.
Андрей Назаровтан буласаҡ Хөкүмәтте ниндәй үҙгәрештәр көтөүе тураһында һоранылар.
– Үҙгәрештәр мөһим түгел, иң мөһиме – һөҙөмтә. Шуға күрә хәҙер, Башҡортостан Башлығы ҡушыуы буйынса, Хөкүмәттең структураһы һәм персональ составы буйынса эшләйәсәкбеҙ. Ҡарарбыҙ. Алдан уҡ шуны әйтәм, тырышып эшләгән, көс һалған күп кешеләр ҡаласаҡ. Тик бер ни тиклем үҙгәрештәр ҙә булыр, – тине ул. – Һуңғы осор тренды – федераль үҙәк менән эшләү. Был йәһәттән бурыстарҙы тағы ла әүҙемләштерәбеҙ.
Андрей Назаров үҙенә ҡарата ышаныс өсөн Радий Фәрит улына рәхмәт әйтте, тырышып эшләргә ниәтен белдерҙе. “Мин бында тыуғанмын, үҫкәнмен. Күп этаптар үттем – Баймаҡ, Сибай, Өфө. Үҙемдә көс тоям, 50 йәш булһа ла, йәшмен әле”, – тине ул.
Ултырыш башланғас, Андрей Назаров залдағыларҙы башҡортса сәләмләне. Журналистар унан, артабан да башҡорт телендә сығыш яһаясаҡһығыҙмы, тип һораны.
– Башҡорт телен юғары кимәлдә белмәһәм дә, ул минең өсөн тыуған тел. Күңелемә әсә һөтө менән һеңдерелгән. Беренсе телем рус теле түгел, мин русса һуң һөйләшә башланым. Аҙаҡ үҙем теләп башҡорт телен өйрәндем. Был миңә оҡшай ине, шулай уҡ мөһим һәм кәрәк. Тик 12 йыл Мәскәүҙә йәшәгәндә әҙерәк онотолдо. Хәҙер яңынан практика үтәм. Шуны әйтә алам, башҡорт теле инглиз теленә ҡарағанда моңлораҡ һәм күңелгә яҡыныраҡ, – тине Андрей Назаров.
Фото: Башҡортостан Башлығы сайты.
Автор: Альфия Мингалиева.
Читайте нас:
© 2024 Ижтимағи-сәйәси гәзит. Ойоштороусылары: Башҡортостан Республикаһының Матбуғат һәм киң мәғлүмәт саралары агентлығы, Башҡортостан Республикаһының "Башҡортостан Республикаһы" нәшриәт йорто дәүләт унитар предприятиеһы.
Свидетельство о регистрации СМИ: ПИ № ТУ 02 - 01391 от 12 августа 2015 г. выдано Управлением федеральной службы по надзору в сфере связи, информационных технологий и массовых коммуникаций по Республике Башкортостан. Главный редактор Имангулова М.Г.
Все материалы сайта «Хәйбулла хәбәрҙәре» предназначены для пользователей старше 18 лет.
Телефон
8(34758)2-14-98
Электрон почта
Адресы
453800, Башкортостан, Хайбуллинский район, с.Акъяр,пр.С.Юлаева, д.41.
Реклама хеҙмәте
8(34758)2-15-62
Редакция
8(34758)2-14-98
Ҡабул итеү бүлмәһе
8(34758)2-14-95
Хеҙмәттәшлек
8(34758)2-15-62
Кадрҙар бүлеге
8(34758)2-14-95