“Урындағы башланғыстарҙы хуплау” программаһы ярҙамында ауыл биләмәләре төҙөкләндерелә

2014 йылдан эшләп килгән “Урындағы башланғыстарҙы хуплау” программаһы районда әүҙем тормошҡа ашырыла. Тап ошо программа ярҙамында ауыл биләмәләрендә һуңғы йылдаҙа бихисап эштәр башҡарылды.

Күптән түгел был программа буйынса быйыл тормошҡа ашырыласаҡ проекттарҙы һайлау конкурсына йомғаҡ яһалды. Һөҙөмтәлә райондан алты проект еңеүселәр иҫәбенә инде. Бына улар Федоровка ауылында башланғыс мәктәптең спорт залына капиталь ремонт яһау, Таштуғай һәм Бәләкәй Арыҫланғол ауылдарында зыяратты кәртәләү, Юлбарыҫта һәйкәлде ремонтлау, Атингән ауыл биләмәһенә янғын һүндереү автоцистернаһы, Әлибай ауылы клубына музыкаль ҡорамал алыу. Шуны билдәләп үтергә кәрәк: Әбеш ауыл биләмәһе йыл һайын һайлап алыу конкурсын үтә. Былтыр улар программала ҡатнашып, Һаҡмар-Наҙарғол ауылы зыяратын кәртәләп ҡуйһалар, быйыл иһә ошондай уҡ изге эште Бәләкәй Арыҫланғол ауылында ла атҡарырға ниәтләйҙәр.

- Ауыл хакимиәте башлығы Таһир Мөғлитдин улы Юнысов “Урындағы башланғыстарҙы хуплау программаһы”нда ҡатнашырға тәҡдим иткәс тә ауыл халҡы дәррәү ризалашты һәм йыйылышта тәҡдим ителгән бер нисә проект араһынан иң лайыҡлыһы һәм кәрәклеһе тип бер тауыштан зыяратты кәртәләүҙе күтәреп алды. Был программала еңеүебеҙгә ауылдаштар бик шат. Ағас бик тиҙ сереү сәбәпле зыяраттың әлеге ҡоймалары күпкә сыҙамаҫ ине. Зауыҡлы биләмәләр йылында был бик кәрәкле эш, сөнки мәңгелек йортобыҙ матур, таҙа булырға тейеш. Былай йыл һайын өмәләр үткәрелеп, зыяратыбыҙ йыйыштырыла. Ошо программа ярҙамында уның ҡоймаларын да яңыртып ҡуйһаҡ, тағы ла яҡшыраҡ буласаҡ. Төҙөлөш материалдары алыу менән был изге эш башланып, ауылдаштар ярҙамы менән тиҙ арала тамамланыр тип өмөт итәбеҙ,- тине Бәләкәй Арыҫланғол ауылынан Гөлназ Сурина.

Таһир Юнысов, Әбеш ауыл биләмәһе башлығы:

Быйыл ошо уҡ проектты Бәләкәй Арыҫланғол ауылында ла башҡарыуҙы тәҡдим иттек. Ауыл халҡы был эштең мөһимлеген аңлай. Һаҡмар-Наҙарғолдар кеүек үк өмәләп кәртәләргә ҡарар иттек. Проекттың хаҡы 440 100 һум. Республика бюджетынан 326 мең һум бүленә. Ҡалған сумма ауыл хакимиәте, бағымсылар һәм халыҡтан буласаҡ. Инициатив төркөм булдырылған. Бесән эшләү тамамланғас, зыяратты кәртәләп ҡуйырбыҙ тип уйлайым. Ул тимер бағаналар менән кәртәләнеп, профнастил менән ябыласаҡ. Сөнки ағас ҡоймалар, 10-12 йылда сереп ҡолай башлай. Ә был тимер ҡоймалар матур ҙа һәм оҙаҡ йылдарға ла етәсәк.

Дилара Носкова, Һамар ауыл биләмәһе хакимиәтенең эштәр идарасыһы:

Фото: асыҡ интернет сығанаҡтан.